ދުނިޔޭގެ ފުޓްބޯޅަ މުބާރާތް (ފީފާ ވޯލްޑް ކަޕް))ގެ ތާރީޚުގައި އެންމެ ގިނަ ލަނޑު ޖެހި ކުޅުންތެރިޔާގެ ޝަރަފު، މިއަހަރުގެ މުބާރާތުގައި 10 ލަނޑު ކާމިޔާބުކޮށް ޖުމްލަ 22 ލަނޑާއެކު ފްރާންސްގެ ކެޕްޓަން ކީލިއަން އެމްބާޕޭ ހޯދައިފިއެވެ.
އުމުރުން 27 އަހަރުގެ އެމްބާޕޭ މި ތާރީޚީ ރެކޯޑު ހެދީ ހޮނިހިރު ދުވަހުގެ ރޭ (18 ޖުލައި 2026) އެމެރިކާގެ މިއާމީގައި އިނގިރޭސިވިލާތާ ދެކޮޅަށް ކުޅުނު ތިންވަނަ ހޮވި މެޗުގައި ދެ ލަނޑު ޖަހައިގެންނެވެ.
އެމްބާޕޭ މި ރެކޯޑު މުގުރާލީ އާޖެންޓީނާގެ ކެޕްޓަން ލިއޮނަލް މެސީގެ 21 ލަނޑުގެ ރެކޯޑު ފަހަތަށް ޖައްސާލުމަށްފަހުއެވެ. އިނގިރޭސިވިލާތް އަތުން 6-4 އިން ފްރާންސް ބަލިވި މި ފޯރިގަދަ މެޗުގެ ދެވަނަ ހާފުގައި އެމްބާޕޭ ޖެހި ދެ ލަނޑާއެކު، އޭނާ ވަނީ މިއަހަރުގެ ވޯލްޑް ކަޕްގެ ރަން ބޫޓުގެ ރޭހުގައިވެސް 10 ލަނޑާއެކު ކުރި ހޯދާފައެވެ.
ސްޕެއިންގެ ރެއާލް މެޑްރިޑަށް ކުޅެމުން އަންނަ ހުނަރުވެރި ފޯވާޑް މިހާތަނަށް ތިން ވޯލްޑް ކަޕެއްގައި (2018، 2022 އަދި 2026) ޖުމްލަ 22 މެޗު ކުޅެފައިވާއިރު، އޭނާ ވަނީ ވޯލްޑް ކަޕްގައި ޕެނަލްޓީ ނުލައި އެންމެ ގިނަ ލަނޑު ޖެހި ކުޅުންތެރިޔާގެ ރެކޯޑުވެސް (19 ލަނޑު) ހާސިލުކޮށްފައެވެ.
މި ތާރީޚީ ކާމިޔާބީއާއެކު އެމްބާޕޭ ވަނީ ޖަރުމަނުގެ މިރޮސްލާވް ކްލޯސޭ (16 ލަނޑު) އާއި ބްރެޒިލްގެ ރޮނާލްޑޯ (15 ލަނޑު) ފަދަ ފުޓްބޯޅައިގެ ލެޖެންޑުންގެ މައްޗަށް ކުރިހޯދައި، ދުނިޔޭގެ އެންމެ ޝަރަފުވެރި މުބާރާތުގެ ރެކޯޑު ފޮތުން ޖާގަ ހޯދައިފައެވެ.
